نص ثانية ويعدّي، أو ميعدّيش خالص. نص الثانية دي هي البريف كله.
المطعم عنده أكل يتصوّر، والمتجر عنده منتج يتحط على الرف. أما الخدمة، فبتيجي في علبة فاضية: جوّاها وعد بس، ومفيش كاميرا بتعرف تصوّر وعد.
اقرا القصة كاملة
عشان كده في الخدمات، الصورة مش بنلاقيها جاهزة. بنقرّرها.
أربع براندات في السعودية، وأربع علب فاضية:
شاين: مغسلة ملابس وأحذية شعارها «مو بس غسيل»، لأنها كمان بتصلّح الأحذية والشنط الفخمة. والقميص النضيف شبه أي قميص نضيف، فبدل ما نصوّر النتيجة صوّرنا القيمة: كوتشي قد العربية داخل مغسلة عربيات، وجزمة قديمة في العناية المركّزة، وشنطة شانيل في فاترينة متحف. مبالغة محسوبة بتقول إن حاجتك الغالية هنا قطعة فنية، وبنفسجي وتركواز في كل بوست عشان شاين يتعرف قبل اللوجو.
مصور: منصة المصورين والمخرجين، بيعرضوا فيها شغلهم ويلاقوا عملاء، زي منصات العمل الحر. وأي منصة زي دي بتبدأ بمشكلة البيضة والفرخة: مفيش عملاء من غير مواهب، ولا مواهب من غير عملاء. فكان القرار مرحلتين: نملاها الأول مصورين ومخرجين وممثلين وموديلز من كل المملكة، وبعدين نوصّلهم بالعملاء. والمرحلتين اتنفذوا فعلًا.
مصور سبيس: من نفس العيلة، وبيأجّر مساحات التصوير، فكل إعلان بيكلّم طرف من الاتنين. لصاحب المكان: راجل شايل بيته على إيده، و«شارك مساحتك مع المحترفين». وللمصور: لوكيشنات طالعة من عدسته زي شريط فيلم. والحجز كله اتلخّص في جملة: «بين فكرة تصويرك واللوكيشن المثالي ضغطة زر».
رينتال: منصة لتأجير الفرش والمعدات. الإعلان المعتاد كان هيحط الكنبة على خلفية بيضا وجنبها السعر. إحنا ورّينا اللي هتعمله بيها: مجلس متفرش والقهوة جاهزة، وعزومة شوي في الجنينة، وركن بودكاست جنب كاميرات عليها FOR RENT. الناس مش بتأجّر كنبة. بتأجّر القعدة.
سوشيال ميديا لبراندات الخدمات في السعودية، معمولة في مصر عشان الخدمة اللي مالهاش شكل تتشاف وتتفهم في نص ثانية.
BOMA STUDIO
حملة لعبة المغسلة«لعبتنا نخلي ملابسك تنوّر»: ماكينة أركيد بنفسجي جوّه المغسلة، وعلى شاشتها غسالات وسلة هدوم وإسفنجة بتضحك. أتقل شغلانة في البيت، متقدّمة كأنها ليفل سهل.
حملة كل زاوية تلهمك«كل زاوية تلهمك بأفكار جديدة»: مصور مايل فوق كنبة صفرا بيصوّر واحد مسترخي بكتاب، واللقطة كلها من فوق. المكان هنا مش خلفية، ده نص الفكرة.
حملة تقييم الخمس نجوم«شاين الأسرع والأفضل»: موظف بلبس الجرّاحين وجوانتي أزرق بيدوس على خمس نجوم دهب، ووراه الغسالات. التقييم اللي العميل بيدوّر عليه قبل ما يجرّب أي خدمة، قدامه من أول ثانية.
حملة شارك مساحتك«شارك مساحتك مع المحترفين»: راجل بشماغ شايل بيته على إيده، مقطوع من الأرض بترابه. الإعلان ده لصاحب المكان مش للمصور: المساحة اللي عندك ممكن تشتغل لحسابك.
بوست قائمة الخدمات«OUR SERVICES»: كاميرا ملفوف حواليها شريط فيلم مليان لقطات، وجنبها «مساحات بصرية مختلفة تجمعها جودة واحدة». كل خدمات مصور في كادر واحد، من غير ولا ليستة.
حملة سرعة التوصيل«سرعة بالإنجاز والتوصيل»: مندوب شاين على موتوسيكل بنفسجي طالع من شاشة التطبيق، وخطوط النور ورا منه. من الطلب لباب البيت في صورة واحدة.
حملة تغطية المملكة«خدمات تصوير احترافية في كل أنحاء المملكة»: لوحة إعلانات عليها 2026، وفيها مصور بالتوب والغترة واقف على جبل قدام الرياض وبرج المملكة. إعلان عن الانتشار، متصمّم هو نفسه كلوحة طرق.
حملة غسيل وترميم الأحذية«تغسل؟ ترمم؟»: كوتشي أبيض قد العربية داخل مغسلة عربيات، وعامل شاين بيلمّعه بالماكينة. الحجم بيقول اللي الكلام مايقدرش يقوله: الجزمة دي بتتاخد بجد.
حملة قبل التنظيف«باهت؟ تالف؟»: شنطة شانيل بيضا وكوتشي باين عليهم الاستعمال، ووراهم موظف بجوانتي بيجهّز الغسالة. سؤالين بيبعتوا العميل على دولابه على طول.
حملة اختيار اللوكيشن«مئات مواقع التصوير بانتظار عدستك»: مصور بشماغ قاعد على كرسي مكتب، وطالع من عدسته شريط فيلم كل فريم فيه لوكيشن. مكتبة أماكن كاملة، معروضة بالطريقة اللي المصور بيفكر بيها: فريم ورا فريم.
حملة إنقاذ الحقيبة«تحسب إن القصة انتهت؟»: شنطة شانيل عليها بقع مكياج، والروج والبودرة واقعين جنبها على كرسي قطيفة. السؤال بيكلّم اللحظة اللي صاحبتها افتكرت فيها إن الشنطة راحت.
حملة انضم كمصور«انضم لمصور ووسّع نطاق شغلك»: مصور بشنطة ضهر قدام باب في حيطة بيضا، والباب مفتوح على وادي وجبال. المرحلة الأولى في كادر واحد: نملا المنصة مصورين قبل ما نجيب العملاء.
حملة اللوكيشن اللي بيكسّبنفس جملة «اختر لوكيشن تصويرك القادم» بصورة تانية: المصور قاعد على عواميد عملات جوّه طبق أسود. نسخة بتكلّم المصور عن المكسب، مش عن المكان.
حملة إنعاش الحذاء«رجّع الحياة لحذائك»: كوتشي قديم نايم على سرير مستشفى ومتوصّل بجهاز القلب. التصليح بيتحكي كأنه عملية إنعاش، لأن الجزمة دي عند صاحبها عمرها ما كانت مجرد جزمة.
حملة الحجز بضغطة زر«بين فكرة تصويرك واللوكيشن المثالي ضغطة زر»: عميلة بتتكلم مع موظفة مصور سبيس على مكتب، وفوقهم «حجز بالساعة | دفع آمن | خصوصية تامة» وزرار «احجز كادرك الآن». أسئلة العميل التلاتة متجاوبة قبل ما يسألها.
حملة سرعة الإنجاز«شاين سرعة بالإنجاز»: موظف شاين مبتسم بيسلّم كوتشي أبيض نضيف، والناس ورا منه مغبّشة من السرعة. الخلفية بتجري وهو ثابت: شغل سريع، وتسليم مضبوط.
حملة لا تضيّع وقتك«ما تضيّع وقتك»: بنت بعباية وسط كوم كوتشيات، ماسكة واحد ووشها زهقان، والساعة فوقها على الحيطة. المشكلة متصوّرة زي ما هي، والحل تحتها في تلات كلمات.
حملة من التراثي إلى الحديث«من الكوخ الريفي إلى الاستديو الحديث»: مصور ماشي في كادر واحد، ورا منه مجلس تراثي ودلة، وقدامه كنبة رمادي ولوحات مودرن. كل الاختيارات في خطوة واحدة.
حملة معاملة خاصة للملابس«ملابسك تستاهل معاملة VIP»: بنت بطرحة وعباية سهرة مطرّزة قدام مراية بلمبات. القطعة اللي بتتلبس في المناسبات الكبيرة محتاجة مغسلة فاهمة هي ماسكة إيه.
بوست شاركنا رأيك«شاركنا رأيك!»: شاب بالغترة والنضارة قاعد في مجلس، ومادد الموبايل بتطبيق رينتال ناحية الكاميرا. سؤال «أي منتج تحتاجه أكثر؟» بيفتح كلام في الكومنتات، وبيقول للبراند يوفّر إيه.
حملة الثقة في التسليم«شاين = ثقة»: إيدين بتحط قميص أبيض متطبّق جوّه شنطة معدن، زي اللي بتتنقل فيها الحاجات الغالية. معادلة واحدة، والصورة هي الإثبات.
حملة تأثيث أسهل«تأثيث منزلك أصبح أسهل!»: لقطة من عين العميل، وإيديه ممدودة في أوضة لسه بتترسم بخطوط خضرا، والكنبة بس اللي بقت حقيقية. التأجير متقدّم كأنه سحر: تتخيّل الحاجة، تلاقيها قدامك.
حملة هيبة الجلد«الجلد له هيبة»: شنطة شانيل بيضا على قاعدة جوّه فاترينة متحف، وتحتها لوحة تعريف زي أي قطعة أثرية. كده شاين بيشوف كل شنطة بتدخله.
حملة تجربة العملاء«تجربة حقيقية من RENTAL»: مجلس متفرش كامل بكنب رمادي وترابيزات خشب، والقهوة والتمر جاهزين على الصينية. «شوفوا كيف عملائنا يبدعون» بتخلّي العميل هو اللي يحكي، مش البراند.
بوست وش تحتاج الشهر القادم«وش تحتاج؟»: شاب مسترخي على كرسي بحر وفي إيده عصير والتطبيق، ووراه لوكيشن تصوير كامل بإضاءته وكاميراته. البوست بيسأل عن الشهر الجاي، والصورة بتقول إن كل ده ينفع يتأجّر.
حملة منزل ومكتب وفعالية«منزل، مكتب، أو فعالية؟»: صاحب البيت بالغترة بيبص للكاميرا، ووراه العيلة متجمّعة على الشوي في الجنينة، وفي مقدمة الكادر موبايل عليه التطبيق. الإعلان مش بيبيع كراسي وترابيزات، بيبيع العزومة كلها.
حملة معدات البودكاست«في مكان واحد!»: ركن بودكاست جاهز بكرسي ومايك ولابتوب، وجنبه فاترينة كاميرات وعدسات عليها FOR RENT. صانع المحتوى بيشوف الستوديو بتاعه كامل، من غير ما يشتري قطعة واحدة.
حملة عروض آخر الشهر«العروض الأخيرة لشهر يوليو!»: نتيجة مكتب واقفة على JULY وجنبها كاميرا نيكون تحت سبوت لايت. الشهر اللي بيخلص هو الرسالة، و«استغل الفرصة الآن» هي الخطوة الجاية.
كل الشغل
